PENYALAH JADI MALI.
NYADI TERUBAH Iban nemu mantang orang jadi salah serak ari ajar Sengalang Burong leboh Sera Gunting beleman enggau ibu serta menyadi indai iya empu ke benama Dayang Langit ke digelar Dara Chempaka Tempurong Alang.
Nyadi ko Sengalang Burong nganu Sera Gunting. “Nuan enda tau enda kena pantang, laban nuan beleman enggau ibu nuan empu.”
Tang ko kaban menantu Sengalang Burong. “Nya amat aya, laban Sera Gunting endang amat uchu nuan, tang iya ke diau ba nuan ditu semina nemuai aja. Nya alai enti iya dibunoh, kasatu nadai mai berita pulai ka menoa iya empu, enggau kadua enti iya dibunoh kitai ditu, apai indai iya din enda nemu tunga iya. Tang dalam pia kitai enda mantang seduai iya, adat diadu ka kitai, awak ka seduai betimbang. Nyadi pemesai adat nya barang ko nuan empu ngator.”
Nya alai ninga runding kaban menantu iya munyi nya, Sengalang Burong lalu bejako, ko iya. “Enti munyi tu bunoh ka babi delapan, ka ganti darah seduai, nyabur delapan ka tungkat dunya ngambi ka enda beguyat. Nyadi pekasi menoa enggi lelaki sigi rusa, enggi indu sigi alas ngerang, tang anak seduai dibunoh, enggai ka ngachau menoa.”
Udah nya Sengalang Burong lalu ngasoh Sera Gunting ngingat ka adat kena ngadu ka menoa sida din enti leman bisi ngemesai tu:
(a) Enti beleman enggau anak (ukai jadi) kena pantang.
(b) Enti jadi enggau mentua, indai bini tauka apai laki, kena pantang.
(c) Enti beleman enggau anak bendar tauka anak iru, tauka anak tiri, enti udah nyadi anak kitai, kena pantang.
(d) Enti beleman enggau mentua, menyadi indai bini tauka apai laki kitai; lelaki kena tunggu babi siko, sangkar babi semilan, enggi indu babi siko, sangkar babi tujoh igi jabir. Seduai tau jadi.
(e) Enti serak satu enggau serak dua babi siko ari lelaki, benda semilan igi jabir; enggi indu babi siko benda tujoh igi jabir. Seduai tau jadi. Babi bunoh enggau nyabur.
(f) Nyadi enti serak dua enggau serak tiga ari lelaki babi siko benda sigi alas ngerang; enggi indu babi siko benda sigi panding. Babi bunoh enggau nyabor.
(g) Enti serak tiga enggau serak empat, lelaki babi siko, benda sigi panding, tu ke benama ‘kalih di darat.’ Babi bunoh enggau duku tang bebutoh kunding ka beliong.
Serak ka lebih ari tu semina agi bisi adat kena ngering ka samengat.
Nyadi adat tu dikena tujoh serak. Nya alai datai ba tuboh Beti ke digelar Bujang Berauh Ngumbang dia bisi baru orang beleman, Abang enggau Dayang Tali Bunga. Nyadi Tali Bunga nya anak petunggal Abang. Seduai tu patut disapat, tang enda tisi ka adat, nya alai deka dipantang Beti. Kejang deka mantang dia sida meda antu bejalai mansa, lalu ngangau nanya ka pengawa sida Beti. Beti lalu madah ka diri deka mantang Abang enggau Dayang Tali Bunga, laban seduai jadi serak satu enggau dua. Ninga munyi nya antu lalu bejako.
“Enti baka tu jalai nuan ngator mensia, Beti, abis samoa mensia mati.”
Beti lalu nanya ka adat.
“Adat,” ko Antu, “babi dua bunoh kita; siko bunoh di ai enggau siko bunoh di darat kena nasih ai enggau tanah. Nyadi benda enggi lelaki semilan igi jabir, enggi indu tujoh igi jabir, laban Abang jadi enggau anak petunggal iya empu ke baru sakali petunggal enggau iya.
Antu lalu enda ngasoh agi ngena adat bepantang. Enti orang beleman enggau serak ari atas tu endang enda tau jadi. Kamaiatu enti didawa ngagai perintah dijail; tang enda ga tau jadi. Enti beleman ari serak tu ka baroh sapat ka ai magang baka adat ke disebut dia tadi.
PENYALAH JADI MALI.
NYADI JEMAN dulu kalia kitai I ban enti jadi mali baka anak jadi enggau apai tauka indai, tauka jadi enggau ay a enggau ibu, tauka mentua jadi enggau menantu, tauka menantu jadi enggau mentua indu tauka lelaki, ukum iya kena bunoh kadua-dua seduai ke ngaga penyalah nya, jalai munoh enggau buloh aur ke udah dilancham tajam bendar lalu dipantang ka ba seduai begembar-gembar, indu ari baroh lalu lelaki ari atas. Lalu dia mega seduai lain ditumbak lalu buloh aur ditanam atas bangkai seduai kena ngingat ka alai bangkai. Nya alai di sebelah menoa kitai bisi buloh dikumbai aur pantang, dipeda turun menurun kitai Iban nyentok ka kamaia hari tu datai ka belama-lama iya ila.
Kabuah alai badu agi ngena ukum bepantang enggau buloh aur, bepun ari jerita indu siko benama Simbah dulu kalia nambah ka ajar Sengalang Burong ti baru udah dibacha ba pun dia tadi. Laban jerita tu enda bepun ari tusut nya alai enda nemu ka iya amat tauka bula. Nyadi Simbah nya dara, tang nyau kalama iya dipeda orang ngandong. Meda iya ngandong bakanya lalu ditanya orang sapa ke ngayap iya. Tang laban Simbah digayap menyadi iya empu, nya alai iya enggai madah ka orang laban takut ka diri dipantang orang enggau aur. Kandong iya pan nyau chukop bulan, iya lalu beranak tang menoa balat kudi, siang malam ujan enggau kabut nadai ngetu. Tanah tusor balat bendar di maioh bengkah endor, lalu mensia pan nadai masok gawa laban hari selalu jai. Meda hari enda badu kudi, dia apai indai iya enggau orang maioh, mint a iya enda tau enda madah ka lelaki ke enggau iya beleman. Enti iya enda madah, orang semaia deka munoh iya, meda kudi lain enda badu. Nyau hari siti apin orang deka munoh iya, iya berua nimang anak iya di ruai, lalu didinga orang.
Tu munyi leka timang iya:
Adu-adu anak aku ukai nadai apai,
Endang bisi orang ngayap.
Tang deka aku madah,
Takut ka adat berat.
Anang munoh aku,
Enti salah tau betimbang
Besapat di ai besapat di darat.
Bunoh ka babi siko di darat
Lalu siko di ai, babi emperingat.
Ambi ka duku siti kena mantap urat lensat.
Beliong lajong kena mungga urat melabat.
Jalong jebong kena nudong
Tekuyong baroh ungkap.
Pua kumbu muau kena kitai miau
Moahari balat betakat.
Sumpit tapang kena ngerejang lubang kilat.
Udah nya baru ukum benda rusa
Kena besapat ngambi ka kena muai pemali.
Ninga leka timang iya munyi nya sida sarumah lalu berunding tekala nya. Lalu sida madah ka enda munoh iya enti iya madah ka bagi lelaki ke enggau iya salah, tang ngereja nitih ka leka timang iya. Iya lalu madah ka lelaki ka enggau iya beleman nya Lamit, menyadi iya empu ti ngayap iya lalu ngasoh iya ngandong. Udah nemu nya, orang maioh lalu ngereja nitih ka samoa utai ke dipadah ka iya nunda buah timang iya tadi. Sereta udah tembu sida ngereja nya, hari pan lalu baik baka ka dibuai empeleman. Simbah seduai Lamit enda jadi, laban seduai bangat diri menyadi tampong pala. Nyadi pengudi hari nyau tedoh udah bekau leman seduai ke diadu ka ngena adat nitih ka munyi leka timang Simbah.
Adat tu bedau ditampong Iban nyentok ka diatu. Enti orang bisi jadi belaki bebini salah serak tauka butang betumbang enggau pangkat anak tauka apai, tauka indai, tauka mentua enda tau enda diukum ngena adat lama tu, bunoh ka babi kena besapat awak ka menoa enda kudi.
Ukum Perintah nya siti ga jalai ke baru kamaia hari tu, lalu enda tau enda ninggang. Enti orang ke salah nadai utai kena betimbang iya ditutup Perintah. Satu nangga dua nya anak salah tauka jadi enggau aya sapat di darat enggau di ai. Enti nitih ka jerita tu anak tau jadi enggau aya tauka ibu menyadi apai tauka menyadi indai, Tang adat Perintah diatu seduai enda tau jadi. Dua nangga tiga, reti nya anak jadi enggau petunggal apai tauka petunggal indai besapat di darat aja enggau babi sepa sereta ukum benda sigi alas. Adat Perintah, lelaki kena ukum tigapuloh keti, lalu indii duapuloh keti pulai ka Perintah tang seduai tau jadi.
Ari jerita tu alai kitai diatu badu agi man tang orang ke jadi tauka beleman enggau pangan salah serak. Agi mega iya ke bendar bepun ari ajar Sengalang Burong ngagai Sera Gunting leboh Sera Gunting beleman enggau ibu, menyadi indai iya empu ke benama Dayang Langit ke digelar Dara Chempaka Tempurong Alang ti udah dibacha kitai ba pun dia tadi. Agi mega ba tusut Sengalang Burong deka dibacha kita dalam lambar 30 dia kita macha pasal Puntang Raga ngajar Beti enda ngasoh iya mantang Abang ke deka jadi salah serak enggau Dayang Tali Bunga laban kategal nadai kena betimbang.
Benda tunggu pulai ngagai nyawa duit dikena dalam menoa Bagi Kadua kamaia hari tu:
Benda = Penyampau ba mata duit.
Sigi Menukul pulai ngagai nyawa duit = 50 sen.
Sigi Jabir pulai ngagai nyawa duit = $1.00
Sigi Pan ding pulai ngagai nyawa duit = $2.00
Sigi Alas muda pulai ngagai nyawa duit = $4.00
Sigi Alas Ngerang ngagai nyawa duit = $5,00
Sigi Rusa pulai ngagai nyawa duit = $8.00
Kabuah alai madah ka pemesai sekeda adat tunggu benda pulai ka nyawa duit diatu laban jerita tu bisi mansa sekeda sida. Kenu ko jerita dulu kalia tunggu kitai Iban nadai disebut ngagai nyawa duit nyangka laban apin bisi Perintah tauka nadai duit leboh maia nya. Rintai tunggu nya samina teba ba tengah aja, bisi mit ari nya ngagai sasingkap mangkok lalu bisi mega besai agi. Tang selalu dikena diatu samoa sida ke disebut dia tadi. Tunggu endang sigi nitih ka baka gaya enggau pemesai penyalah orang. Bisi penyalah baka pemalu samina tunggu benda aja nadai enggau manok enggau babi. BIsi mega enggau manok tauka babi aja enda bebenda lalu bisi mega tunggu enggau manok tauka babi sereta enggau benda baka ke disebut tadi dikumbai sangkar. Ka tambah nya nitih ka gaya penyalah, bisi mega tambah besi, lungga, duku tauka nyabur, ka keris samengat enggau benda mega ka kurong samengat. Disebut ngena jako pandak duit nya tauka ganti benda diatu nitih ka pemesai nyawa sida ngagai mata duit baka ke diator datas dia tadi, Taja diatu enggau duit, tang nama benda agi disebut, enti enda nya nyau ukum Perintah disebut keti tauka pikul.
ADAT BELAKI BEBINI.
NITIH KA adat Iban ukai siti jalai orang tau jadi melaki-bini, bisi rami bisi ga enda nitih ka peneka ati, ni ti deka dikena. Tang baik ka rami tauka enda enti orang jadi enda tau enda beterang ngagai tuai rumah enggau apai indai. Umor alai tau bebini, belaki enda tentu temu nitih ka peneka, amat ga adat Perintah abis biak alai tau belaki bebini umor limabelas taun. Tang nadai orang ke bebini belaki udah kena salah laban jadi apin chukop umor, agi mega maioh enda nemu umor diri ke betul. Kenu ko orang rebak ke tuai agi sida laun agi bebini belaki ari rebak ke diatu, tang aku enggai nusoi kabuah alai pia.
Semina ditu aku deka nusoi macham jalai orang tau jadi belaki bebini:
(a) Melah Pinang. Enti melah pinang enda tau enda rami. Tu meh pemadu pemesai pengawa dalam adat belaki bebini.
(b) Anjong lelaki. Enti lelaki dianjong ngagai rumah indu, kurang ari pengerami melah pinang, lalu jalai iya pan lain mega. Ama mega bebala maioh mai orang rumah bukai lalu suah mega empat lima iko aja orang nganjong lelaki, nitih ka pengelantang pemisi enggau peneka ati.
(c) Lelaki nama kadiri ngagai bilik indu sama an ator apai indai.
Tu nadai pengerami, samina beterang ngagai tuai rumah aja, lalu enti deka tau ngempuru ka orang sarumah nya aja, enti enggai tau enda.
(d) Lelaki nama kadiri ngagai bilik indu ari ator enggau pengeras ati iya empu, lalu nadai terang ari apai indai iya. Nadai pengerami, tang samina beterang ngagai tuai rumah enti apai indai sama nadai nagang. Enti apai indai bisi enda ngasoh nya pulai ka pengachau dudi.
(e) Indu nama kadiri ngagai bilik lelaki tuboh puang. Enti lelaki enggau apai indai iya nerima, lalu apai indai indu mega nadai nagang, samina beterang ngagai tuai rumah, seduai lalu jadi. Enti apai indai seduai bisi nagang, tentu pengachau tau nyadi.
(f) Indu Nuntong Ka Kandong. Enti kandong apin dipansut enggau apin dibunoh ka manok jadi ke enselan kena mansut ka kandong, indu enda tau dianjong ngagai rumah lelaki.
Enti manok udah mati kena enselan kandong, nya baru tau nganjong indu ngagai lelaki. Mansut ka butang” sama jalai tu. Mansut ka kandong enggau butang enda tau ba rumah orang.
Nya samoa macham jalai kitai Iban tau bebini belaki. Melah Pinang nya endang pemadu manah ari samoa, tang taja pia maioh ga orang ke jadi keran, jadi betaban, tau begulai melaki-bini semanjai umor, lalu orang ke bebelah pinang bisi mega sarak. Diatu aku deka nusoi ripih pengerami pengawa melah pinang bepun ari nanya indu nyentok ka sarak baru udah lepas melah pinang.
NANYA BINI.
NYADI NANYA bini bisi tiga bengkah penumboh iya. Sabengkah nya, indu endang sigi deka ka lelaki nya laban udah digayap iya, lalu apai indai indu pan endang sigi deka mega. Sakalika udah ditinggal ka iya utai laban iya endang keran deka jadi.
Nyadi sabengkah penumboh iya ari bungah enggau sabong apai indai indu enggau lelaki tauka kaban belayan. seduai. Nyau mansau bungah apai indai lelaki lalu nanya ka peneka anak seduai ka indu nya. Enti iya deka sida lalu beribut ka jako tauka lalu nganjong seruan madah ka hari deka datai nanya.
Nyadi jalai sabengkah agl dikumbai ngerambang, laban indu enggau apai indai iya apin temu deka tauka enggai, laban nadai kala beribut ka jako dulu, lelaki pan nadai ga kala ngayap.
Apin nurun nanya bini, dia apai indai lelaki ngempuru ka kaban belayan ti dikaberat ka sida sama enggau samoa sida sarumah, madah ka pengawa diri deka nanya bini. Enti kaban belayan nadai nagang nya baru nimpoh hari nurun. Tang sabedau nurun seruan dulu dianjong ngagai apai indai indu awak ka sida ngadang penatai sida lalu enda mindah ka bukai hari nya. Nyadi penyampau tuboh orang nanya indu nadai beletak, tang jarang kurang ari lima iko, lalu jarang mega lebih ari duapuloh iko.
Dulu kalia nadai tentu beleman nanya bini, tang kamaia hari tu nyau nitih ka pemisi utai. bebai ka arak enggau kupi, roti mega, Enti tanya nya ukai ngerambang samoa utai ke dibai sida ka nanya dibai tama ngagai bilik indu leboh sida datai. Tang bisi ga dipeda aku orang ka nanya ngerambang samoa utai ke dibai sida baka arak dilalai ka sebelah tanah tauka engkah sebelah bilik orang bukai dulu. Kabuah alai pia, enti jako enda diterima utai ke dibai sida enda diserungkai dia, tang bai pulai.
Bisi mega orang ke enda bulih nanya bini tak pulai malam enti rumah sida enda tentu bangat jauh. Jangka ati aku alai sida bangat tak pulai malam laban malu ka diri enda bulih. Leboh bala sida ke nanya bini tu tadi datai ba ruai indu ti deka ditanya lalu dilalu ka baka ke enggau temuai mega, Udah badu makai lemai, dia apai indai indu lalu ngumbai orang sarumah nya. Sida ka indu pan dikumbai pansut ari bilik ka ruai.
Udah samoa orang sampal dudok, nya baru apai indai indu bejako nanya ka pejalai ngagai sida ke datai. Enti apai indai indu nya enda tentu nemu bejako iya tau ngasoh barang orang ke landik bejako ngari ka iya. Enti bisi nemu, leboh maia tu selalu bisi jako bekarong panjai. Enti apai indai indu nerima jako cli ruai nya baru ngasoh dua tiga iko indu nanya indu empu ka bilik, laban deka pan apai indai enti indu empu enggai, nadai ga penyadi. Enti indu nyaut deka, nya baru nyadi meh kereja. Leboh maia nya mega mutus ka sapa seduai ke nguai ka pangan. Udah putus jako apai indai lelaki ke nanya lalu ninggal ka utai, baka tinchin, lampit tauka utai bukai ke pengamat samoa jako sida. Lalu ari maia nya indu ke ditanya nya enda tau digayap orang bukai agi. Udah nya, baru mutus ka timpoh hari alai melah pinang. Enti sama lantang utai pan bela bisi sedia magang, timpoh digaga serekat agi, kira chukop ngemansau ka tuak, itong ari dua ngagai tiga minggu bakanya, tang selalu ngintai ka bulan mansang.
Udah tawas hari, badu makai pagi, bala sida ke nanya bini pulai magang enggau ati gaga laban sida bulih. Leboh datai di rumah diri empu, orang maioh lalu ngulu sida nanya ka penunga pejalai sida. Dia iya ke empu anak ti ditanya ka bini enggau ati gaga nusoi samoa rita sida lalu mega madah ka timpoh ngagai orang maioh maia nurun ngambi indu awak ka samoa ngadang ngering ka pengerami nya. Lalu kaban belayan rumah bukai ti jauh agi dikeberat ka dipadah tauka kirum ka temuku tali.
Samoa buah rumah ti kena padah ka endang udah dipaum ka leboh malam ke nanya. Rumah ke semak rumah indu dipadah ka sida apai indai indu, lalu sama enggau nganti pengabang, lalu samoa rumah ke dipadah ka lelaki sama ke bala pengabang nambah ka orang empu rumah ke pun kereja. Empat lima hari apin ke nurun orang ka indu betutok ka tepong lalu begaga penganan jala ke dibai. Rumah indu nya anang disebut agi laban endang pun, ukai semina sida ke empu kereja aja, tang sarumah-rumah nya sama rugi, lebih agi enti pengawa besai lalu orang maioh dipadah ka ngagai pengerami nya.
MANSANG NGAMBI INDU.
SAHARI APIN nurun ngambi bini, kaban belayan lelaki ari rumah tauka menoa bukai datai di rurnah lelaki. Leboh sida datai, sida nyua ka tulong baka arak tauka duit ngagai apai indai lelaki, Malam ke deka nurun dia apai indai lelaki ngempuru ka orang maioh sarumah nya berunding ka ator pengawa nya dulu, baka ngator sapa ke dipadu ka bejako enggau utai bukai mega. Badu berandau lalu ditampong pengerami bukai samalam-malam nya, baka ngirup, ngajat berenong enggau main bukai naka peneka ati.Nyau dinihari dia orang ka biak indu enggau lelaki nurun ngelulun asi pulut ka bekal bala enggau ka dibai ngagai rumah indu mega. Leboh rnaia ngelulun asi dia sida ka bujang enggau sida ka dara tepantup bendar ati bungah enggau pangan diri. Sida ka indu nyimpan beras ka dalam ruas lalu sida ka lelaki menyadi ka api lalu ngelulun asi. Udah mansau, sida pulai jampat enggai ka enda sempat alai nyikap ngepan diri alai nurun. Hari pan nyau tawas mega leboh maia sida badu.Udah samoa orang badu makai pagi, samoa orang ke enggau lalu beradu magang, sereta gendang pan ditebah kena ngelagu orang ke beradu. Biak tuai, mit besai samoa nyikap ngepan diri empu. Ngepan ke naka pemanah, duku ngepan diri empu ditangkin, lalu samoa ke bisi nyan senapang diri ernpu. Enti merau orang ka indu bengepan Iban dipasok ka di rumah, tang enti bedarat enda dipasok nganti datai semak rumah indu. Perau ke alai bala indu dikajang enggau pua kumbu sereta dilagu enggau menira enggau utai bukai, lalu dia mega alai sida ke begendang. Tang ditu aku deka nusoi pengerami ngambi indu bedarat kira ka pengumbas iya penyauh.Leboh samoa orang udah sedia magang, nya baru tuai kayau begerah bebai nurun. Tuai kayau nya, apai indai lelaki ke empu bini deka diambi. Laban pengawa ngambi indu disema ka ngagai ngayau. Sida ke biak begendang bejalai niti rumah kena ngansak orang ke beradu lalu meransang barang sida ka lembau nurun awak deka. Udah tuai kayau begerah setak-kasetak iya lalu nurun ngenulu ka bala nyan menira sereta nangkin pedang tauka malat barang ti kebisi iya. Udah nya lalu ditangkan ka orang bukai enggau sida ke begendang. Orang ke begendang endang selalu ba tengah-tengah bala. Barang sapa sida ke nebah gendang nyau lelak iya minta silih pangan bukai lalu samanjai jalai sida besilih-silih.Kabuah begendang ka besai agi, ukai semina ka pengerami aja, tang enggai ka ninga burong jai, tambah mega, awak ka antu babas antu keranggas mindah, nyeliah ninga gendang. Enti menoa nu’mbas penyauh kira pejalai clua tiga jam, datai kira tengan jalai ba endor ke bisi ai sereta manah alai ngetu, dia tuai kayau mai bala iya ngetu merarau. Utai kena merarau asi pulut ti endang udah dilulun pagi nya enggau lauk babi, manok tauka utai bukai. Tang chapak mangkok endang nadai kala mai kengka ke udah dipeda aku. Nya alai daun inch kena nyadong pemakai. Enti menoa jauh kira ka pejalai sahari suah agi ngetu lalu merarau bechuan ka matahari maia tengah hari. Tuai kayau tau enda iboh meri bala merarau enti menoa semak disebut ka nadai penyauh. Udah bala badu makai lain mupok baru bejalai sereta enggau gendang nyentok ka datai.Leboh bala datai semak rumah, di pengkalan tauka ba sabarang ai ke tunga ngagai jalai penatai, sida lalu ngetu mandi enggau belelak. Badu mandi lalu beradu masok ka ngepan manah, lalu sida ke bengepan, Iban lama agi nganti tembu, lebih agi lubah orang ka indu, laban maioh agi macham ngepan. Ukai main pengerindu enggau pengeransing ati leboh tu laban gendang enggau pengerami orang ke di rumah nyau udah didinga lebih agi baka sida ka bujang enggau ka dara ngemata ka pangan diri beradu.Leboh maia ngetu enggau beradu pengari orang ke empu rumah datai ngalu pengabang ngagai endor ke beradu mai manok, piring, menira enggau gendang. Dia mega sida ngasoh sabarang sida ke tuai miring kena ninggal ka burong enggau samoa utai ka jai awak ka enda datai ka rumah. Udah samoa orang badu beradu, pengari ke ari rumah lalu angkat bejalai ngenulu ka bala lalu ditangkan ka tuai kayau, udah nya betangkan-tangkan tuai agi dulu agi, pupus lelaki ditangkan ka bala indu. Orang ke begendang ba tengah-tengah bala, nadai ngetu begendang nimbal enggi orang an rumah. Singkang pejalai belubah-lubah nitih ka gendang lalu orang ke bengepan indu enggau lelaki ngelingut ka pejalai diri mandang ka pemanah gamal. Samoa ma enggau utai bukai di angkut orang ke empu rumah ka rumah.
PENGABANG NIKI.
LEBOH BALA datai cii tengah laman, orang ke empu rumah lalu nimbak ka bedil, senapang enggau merechun. Lalu pia mega bala ke datai ngalah, samoa ke mai senapang ditimbak ka magang nuju ka langit nimbal enggi orang ke empu rumah. Enti bedil maioh, munyi ka runtoh langit. Aku empu udah meda lebih duapuloh batang bedil besai enggau mit dipasang enggau senapang ukai ke empat lima puloh batang. Aku enda nemu kabuah bukai alai betimbak ka bedil enggau senapang leboh rami melah pinang lebih agi ari ngerindu ka ati. Dipelaba aku aja nyangka lahan rami melah pinang dikelulu enggau disema ka baka ngayau.
Di kaki tangga di pelintang ka babi, lalu digayang kena pengabang niki enggau bedil sabatang dipelintang ka di pala tangga. Lain di pala tangga mega di engkah ka dulang ke bisi ai enggau batu perunsut. Samoa pengabang ke niki nyepoh ka kaki sida magang ka dalam dulang nya leboh sida nyingkang ari pala tangga. Ba penama nya, orang ke empu rumah miau pala pengabang enggau manok kena masa sida, tang enda mega tiap iko pengabang dibiau.
Ari kaki tangga nyentok ka pala tangga, ari punggang setak dikajang enggau pua kumbu lain samoa pengabang ngensurok nya samanjai ruai rumah nya. Bakanya mega pantar diredai pua kumbu samanjai rumah enti pengabang maioh, lalu penyandih mega diredai pua kumbu ka alai pengabang nyandih. Enti enda chukop pua sengapus rumah bulong ka semina pantar orang ke empu pengawa enggau sapintu dua ke ngapit ruai nya.
Pengabang diwong enggau arak enggau tuak leboh sida dipejalai ka orang empu rumah niti ruai datai ka dua tiga iko indu enggau lelaki sereta nyua ka changkir arak tauka tuak ngagai siko. Lain samanjai-manjai rumah nya dua tiga ba sapintu orang ke nyua ka changkir tuak enggau arak. Kadang kadang mega bisi telaga di tengah rumah, reti nya pasu tauka tajau alai tuak enda tau enda di irup pengabang enggau takar mangkok ke besai.
Leboh diwong, pengabang enda tentu ulih nyeliah ngirup datai ka mutah, nya ngamah ka dinding enggau tempuan. Tang nya endang adat dikerindu ke orang empu rumah. Enti rumah orang nya panjai nyau berasai ngelu pala ngirup baru rumah apus. Ukai mudah-mudah pengerichah cnggau pengerami leboh maia pengabang baru niki, ngenjing nadai didinga utai kiba kanan laban pengerichah enggau umba munyi ngepan orang ka indu.
Udah apus ruai, nya baru badu nguwong pengabang, tang agi pengabang dipejalai ka niti panggau rumah abis kurang tiga kali besundang, dikenulu ka enggau gendang sereta bisi orang ngajat tauka mencha kena ngelagu pejalai sida. Kabuah alai ngasoh pengabang bejalai besundang niti rumah kena masa sida, agi mega enggai ka sida lebu ngena ngepan ngena utai manah awak ka samoa orang meda pemanah sida ngena ngepan. Udah chukop sundang niti rumah nya baru orang ke empu rumah lalu nudok ka samoa pengabang berengkah ari pantar orang ke empu pengawa ngagai enggi orang bukai datai ba penyukop iya alai samoa pengabang.
Orang ke tuai enggau orang ke belambar agi dudok ba pantar orang ke pun kereja lalu biak agi ngejang agi ga ari ruai nya, endang nitih ka ripih adat basa. Lalu bala pengabang indu samoa tama bilik indu ke diambi mega. Di bilik din pan baka gaya di ruai diredai ka pua kumbu enggau maioh macham utai bukai kena ngelagu bilik baka bungai keretas. Lelaki ngadu ka lelaki di ruai lalu indu empu rumah nya ngadu ka samoa pengabang indu di bilik. Tang semina indu ke diambi nadai di bilik nya laban endang adat iya belalai sebelah bilik orang bukai ti ngejang ari nya leboh maia pengabang ke ngambi iya baru datai.
Udah samoa pengabang terenah dudok nya baru orang ke empu rumah ngasoh sida pengabang ke tuai agi bedara. Lepas nya baru rneri ai basu kaki tauka ai aus, ukai ai amat tang tuak tauka arak. Udah pupus samoa pengabang diberi ngirup ai aus, nya baru orang empu rumah betanggong ka utai ari bilik, samoa macham utai di empa maia begawai mega, baka penganan, penyaran pulut letup enggau lauk babi, manok, chapi tauka kerebau nitih ka pemisi utai. Samoa utai nya disedia dalam chapak dalam mangkok atas tabak atas talam. Naka ulih orang ke empu rumah ngadu ka samoa utai nya di moa pengabang, bisi nanggong ari bilik, lain bisi mega ngator di ruai. Dia pengabang endang udah sedia dudok berintai nganti orang ke empu rumah tembu ngadu ka pemakai di tengah ruai.
Benda rumbang tuak endang udah sedia ditanchang ngelingi tiang ruai dikelingi mangkok tauka jalong takar, bisi besai, bisi mit. Lalu dia bisi jalong siti ke besai bendar kira umbas nangkup pala pemesai moa iya, lalu nya dikumbai indu jalong. Bisi mega empat lima iti jalong ke mit agi ngelingi iya, lalu nya dikumbai anak jalong, Orang ke tuai enggau orang ke belambar agi end a tau enda ngirup indu sereta enggau anak jalong nya nitih ka pematut ungkup iya. Orang ke diasoh megai takar endang orang ke teleba sereta berekat laban tuak lubah abis dipegai iya, kenu ko orang. Udah nya baru orang ke empu rumah nyambut pengabang nanya ka burong sida ngena jako karong panjai tauka jako pandak. Enti jako panjai tu munyi iya:
Tabi manok sabong, Pengabang,
Enggau samoa orang katuai,
Ti dudok ari atas.
Ai buah tu aya-unggal apong beguyah
Ka bebuah selampor tuai.
Ai tangkai apong nyelelai
Ka ngererai takusai bungai,
Nya alai perenchit ka aku mimit
Dalam chubit changkir bebungai,
Lalu disua ka aku enggau tapa jari megai.
Nya alai nyangka kita
Bisi ditanya Pungga aya kitai,
Bisi ditentang Puntang Medang
Ari pengerang rapi umai,
Nyangka apai Sebalu Jantau bisi ngangau
Ka kita ari pulau rapi serarai,
Nyangka Ketupong bisi ensirong raup Beragai,
Batang bisi melintang tengah jalai,
Nya alai nyangka kita bisi betangga
Ka berayang ke dikumbai kitai mata gansai.
Nanya ka burong ngena ai tuak:
Tabi samoa kita katuai dudok ari atas.
Tu ai buah melanjan manjah
Ka bebuah selampor mansau.
Ai sempuli tanah nyadi,
Diberi Sempeti Api Raja Petara.
Dipie dara tinggi dalam pendi periok temaga,
Lalu disarap dara nelap enggau lipat kain kesumba,
Lalu dituang Endun Kumang dalam balang jebul segala.
Nya alai diatu diperenchit ka aku mimit
Dalam chubit chawan bebunga,
Lalu disua ka aku ngagai kita
Enggau tapa jari dua.
Nya alai tu, nyangka kita
Bisi ditanya aya kitai Pungga
Ari temuda rapi pulau,
Nyangka kita bisi ditentang Puntang Medang
Lalu dikangau ka Apai Sebalu Jantau,
Nyangka Ketupong bisi ensirong raup ensirau,
Batang bisi melintang tuntun atau.
Nya alai tu nyangka kita ke betangga
Ka isau ganjau dikumbai kitai nyabur panjai.
Tuak tauka arak nya tadi lalu di irup orang ke nyaut. Iya nya endang udah dipadu ka dulu nyadi tukang saut. Tang orang ke nyaut leboh tu suah agi ngena jako pandak, kabuah pia enggai ka laun makai utai. Enti bisi burong samoa dipadah ka iya dia, lalu ari nya orang ke empu rumah berunding ka burong lalu ngiga berapa iko manok ti kena miau pengabang nitih ka baka burong. Enti bisi burong bisa, pengabang diasoh ngirup ai takar atas lesong kena nabar ka burong. Udah manok sedia orang ke diasoh miau pengabang bediri megai kaki manok lalu samoa orang maioh diau jenoh enda ragak mending ka leka biau iya. Tu munyi leka biau iya.
Iya bediri nunga ngagai orang katuai lalu nabi sida ngena manok kunchit munyi tu:
Sa, dua, tiga, empat, lima, enam, tu-u-u-joh!
Ho—o—ha! Ho—o—o—ha! Ho-—o—o—-ha!
Nya alai aku ke bediri chegit-chegit
Nyingkang ka kaki,
Nginsit ka tumbit,
Mansa moa kita kemumok dudok bekempit,
Nengah kelasah tikai lampit.
Ukai aku rnai ati jai ati kudi,
Tang mai ati gaga rindu gagit,
Miau kita enggau selanjau manok kunchit,
Diasoh orang ke empu kereja pun pengawa,
Bebelah ka jeragang pinang sa-seit.
Nya alai aku miau yang, miau semang,
Ari belakang mulai ka tumbit.
Ngambi ka yang ganggam kita
Enda mai ati tajam
Baka balan mata binit,
Yang tinggi kita
Enda mai ati jai ngeransi ngenyit.
Nya alai meda kita ka endang tuga tunggul bait,
Enti bumai enda kala alai
Ngisi mengkabai tibang sengepit.
Jari sapiak enggi kita teleba matak setawak,
Jari chawit kita lanchat bulih duit.
Enti berumah kita aya endang teleba
Niri ka kah lamba bait,
Panggau kita enda kala pungkang
Anchau tikai lampit,
Malam enda kala padam dian lampu pichit.
Nya alai tu aya, ukai biau ngapa biau pia aja,
Tu ga nunda biau Apai Sabit Bekait
Aka Bujang Beruang Langit
Dikumbai kitai sapit Raja Petara.
Iya bediri nunga ngagai orang katuai ti ngejang agi ari ka dulu tadi lalu nabi sida ngena manok tawai munyi tu:
Nya alai aku ke bediri giai-giai
Nyingkang ka bulang kaki bejalai,
Mansa moa kita ti kemumok dudok berintai,
Nengah kelasah anchau tikai.
Ukai aku mai ati jai, ati kudi.
Tang aku mai ati gaga rindu rimai,
Diasoh orang ke empu kereja pun pengawa,
Miau kita enggau selanjau manok tawai.
Nya alai nasit tu bisi mimit
Tuah mua pemesai.
Bulu nyeregu balat amai,
Dada bekaka iko kelabu panjai merundai.
Nya alai kena aku miau yang,
Miau semang ari belakang mulai ka gundai.
Ngambi ka yang ganggam kita
Enda mai ati tajam baka balan mata bilai,
Yang tinggi kita enda mai
Ati kudi ngeransi besai.
Nya alai laban meda kita
Ka endang tuga tunggul tuai.
Enti berumah endang teleba
Niri ka kah teras ragai,
Panggau enda pungkang anchau lambar tikai,
Malam kita enda kala padam dian lampu kedai.
Enti bumai enda kala alai enda berasai
Ngisi tibang sapengindang penoh engkabai.
Meda jari sapiak kita endang teleba
Matak setawak raban bebendai,
Jari chawit kita teleba nyerepit duit ringgit bungai,
Lalu bau kita teleba nyan kuntu bedil besai.
Nya alai tu ukai biau ngapa, biau pia,
Tu ga nunda biau Sempandai
Pengaga samoa kitai Ka dikumbai kitai Allah Taala.
Iya lalu bediri nunga ngagai orang katuai dudok ngejang agi ari ka dulu tadi lalu nabi sida ngena manok jelayan munyi tu:
Aku ke bediri jendam-jendam
Nyingkang enggau bulang kaki kanan,
Mansa moa kita ti kemumok dudok betipan,
Nengah kelasah tikai rutan.
Ukai aku mai ati jai, ati kudi,
Tang mai ati gaga rindu ka pangan.
Laban diasoh orang ke empu kereja
Bebelah ka jeragang pinang kejekan.
Aku miau kita enggau selanjau manok jelayan.
Nya alai nasit tu bisi mimit nyelit kaki kanan,
Bulu manah udu jelayan enseriban.
Tu kena aku miau yang
Miau semang kita
Ari belakang mulai ka pisan.
Ngambi ka yang tinggi kita
Enda mai ati jai ngeransi kebawan,
Yang ganggam kita enda mai ati tajam.
Laban meda kita
Endang tuga tunggul tebelian
Kepala bansa
Dayak tuai bansa Iban.
Enti berumah kita endang teleba
Niri ka kah lamba tebelian.
Panggau enda kala pungkang
Anchau tikai pandan,
Api kita enda kala padam.
Enti bumai kita enda kala alai,
Enda berasai ngisi mengkabai
Tibang remendam.
Jari chawit endang teleba
Nyerepit ciuit ringgit kujam,
Bau kita teleba nyan Kelutu bedil meriam.
Nya alal tu ukal biau ngapa biau pia,
Tu ga nunda biau Inan Pantan Jagia Biku Bunsu Petara.
Iya ke bediri lalu nunga sida ka agi biak lalu nabi sida enggau manok lia munyi tu:
Aku ke bediri duga-duga
Bejalai mansa kita kemumok dudok betunga,
Nengah kelasah tikai anyam lima.
Ukai aku mai ati jai
Tang mai ati gaga rindu katawa,
Miau kita enggau selanjau manok lia
Ari asoh orang ka tuai gawai empu pengawa.
Nya alai aku miau yang, miau semang kita
Ari belakang mulai ka pala.
Ngambi ka yang ganggam kita
Enda mai ati tajam
Baka balan mata lungga,
Yang tinggi kita
Enda mai ati jai ngeransi nyida.
Nya alai meda kita
Ka agi biak apin bisi pengawa,
Tang nyangka dudi hari ila,
Pagila lusa kita tau nyadi tuai bansa kitai,
Kepala bansa Dayak.
Sekeda kita ke besekula pandai tinggi tangga.
Lalu tau gawa ngintu kubu buka lima
Sadepa delapan belas sirang.
Nya naka biau aku,
Nya alai sayat manok tu.
Samoa manok ke kena bebiau disayat lalu chabut empat lima lambar bulu sayap digelut enggau darah kena ngenselan samoa pengabang. Ba pengawa melah pinang genselan diendal ka ba tapa jari.
Sereta udah genselan lalu keraroh munyi utai kiba kanan laban samoa pengabang belaboh makai utai nyamai ke lama udah ayan di moa sida. Nyau ujong makai utai, nya baru belaboh ngirup ai takar, Orang ka empu rumah matak pengabang, udah siko-siko ga nitih ka penuai umor ngagai endor ke betakar. Indu takar jalong samoa ngirup, tang anak bisi kena tiga bisi lima nitih ka pematut enggau penuai umor.
Orang ka anembiak bendar enda iboh ngirup anak, lalu dudi mega sida ngirup. Ukai mudah pengerami leboh maia ngirup takar ti kena niki, tikai dikelanit ka awak ka bisi alai orang mutah. Orang ka tuai ditulong bala anak, bala menantu iya, ke bediri ari belakang iya, sedia deka nyaup iya ngirup. Enti orang maioh menantu enggau anak suah tak baru ditumpil ka mulut iya ngagai mangkok takar lalu dipesambut ka kaban sida menantu anak iya ke bediri ari belakang. Balat pengerami leboh ngirup ai takar kena niki. Nya alai, sema ka kitai enti utai inggar ragak, ‘munyi ka betakar.’ Ngenjing riuh munyi utai setak-setak laban orang ngirup, lalu bisi mabok enggau ngelu pala, bisi mabak pemanggai ngusok tikai mega dia. Sekeda ke nakal enda mabok, masong orang ke mengkasak lalu ngintu sida enggai ka pedis, enggai ka utai orang rusak.
Maioh agi mabok rindu agi ati orang ka empu rumah, Pemakai enda nemu enda abis laban apin abis apin badu makai. Orang ke meri ngirup endang enda betagang, lalu orang ke ngirup nguji ka penan diri empu enda mabok. Orang ke tegar ngirup selalu muji diri, lalu orang bukai mega muji iya. Orang ke nyambut pengabang nadai betagang meri orang utai diempa enggau utai diempa datai ka pengabis utai, lebih agi tuak enggau arak. Sida malu enti ruai diri enda basah enda rami. Nya alai jako ke didinga kejang pengabang pulai munyi tu, ‘ngabis ka ai.’
Nya alai adat Iban enda ulih disabaka ka enggau enggi orang bansa bukai dalam dunya tu ba makai enggau ngirup leboh maia gawai. Utai ke naka pemanah ko kitai, jai ko bansa bukai. Udah badu makai utai enggau ngirup ai takar ke kena niki, samoa teda utai enggau chapak mangkok ditanggong pulai kabilik lalu di kemas orang ka indu din magang. Bakanya mega bala pengabang indu di bilik pan udah tembu ditiki ka enggau naka pengerami sida sabuat.
Lepas nya, sida ka biak agi di ruai, barang ke manchal agi, sereta ngelu pala numboh ka pemungah madah ka jari diri lekat lalu minta basu orang ka indu, orang ka dara. Sereta ninga nya, orang ka empu ruai lalu ngiga indu dara tauka bini orang lalu mai sida pansut minching sarang tuak tauka arak. Datai sida di ruai, bala sida ke lekat jari lalu manjong samoa gaga ati. Lelaki ka empu rumah mai indu lalu megai sarang tuak lalu ngisi ka ngagai gelas tauka changkir ti ba jari indu, lalu nyua ngagai sida, Enti sida lembau nyambut enggau jari lalu dibantil mega. Dia maioh macham jako bungah ngalah ka pangan awak ka ngirup. Ama mega ari penumboh nya lalu berengkah bepantun tauka besanggai, pia mega pengabang bukai setak-kasetak rami bukai, bungah begagai nganti maia makai asi.
Enda bengat lama udah nya, orang ka empu rumah betanggong asi ka ruai meri pengabang makai. Tang makai deka beguai mimit laban enggai ka suntok ngator pengerami bukai. Kadua pengabang maioh enda makai laban nyau ngelu pala, agi mega bedau kenyang laban baru udah ditiki. Badu makai, samoa utai ditanggong pulai ka bilik baru, alai iya lalu disikap sida ka indu. Pengabang indu mega makai di bilik sereta lelaki ke makai di ruai dibela bala indu ka empu rumah.
MAKAI LEMAI.
Sereta udah badu nyibur tadi, dua tiga iko orang ka empu rumah endang udah dipadu ka dulu jaga jam maia makai lalu meresa pemansau enggau pengapin utai ti dipandok orang ka indu tiap-tiap pintu. Iya bejalai begerah ka orang ka indu ngasoh sida besungkit enti samoa utai udah mansau, Udah nya sida begerah ngasoh ngator
samoa orang dudok bedijir sedia deka makai. Udah samoa orang dudok, nya baru betanggong utai ari bilik lalu diator naka pemanah, Enti utai udah sedia magang, samoa orang belaboh makai sereta magang. Apin makai, samoa pengabang dipedua dulu awak ka tiap-tiap pintu sama ampit pengabang diberi makai. Samoa lelaki makai cli ruai lalu indu makai di bilik. Indu ti empu rumah begiga ka indu pengabang sebelah bilik orang mai sida makai. Badu makai samoa teda pemakai enggau chapak mangkok ditanggong pulai ka bilik magang lalu disikap orang ka indu.
JAKO MELAH PINANG.
UDAH BADU makai, hari pan nyau udah lama lemai orang ka empu rumah begerah ngasoh orang maioh betugong ngagai ruai orang ka empu pengawa awak ka meda sereta ninga pengerami enggau jako orang ke melah pinang, laban nya endang pun pengawa sahari nya. Orang ke bungah ngirup enti enggai badu diasoh mindah ngagai ruai ti ngejang agi ari ruai ke alai melah pinang. Pi a mega enti bisi orang ka biak mencha, ngajat tauka betanda diasoh mindah ka punggang setak rumah enggai ka ragak semak nya. Tang enti rumah pandak tak asoh ngetu sakali sida ke begendang. Udah samoa orang sampal dudok magang enggau sida ka indu pan udah pansut dudok sama di ruai, penganan, penyaram, tuak enggau utai bukai ditanggong enggau talam enggau tabak pansut ka ruai dipangkang orang ke dudok, Orang ti dipadu ka bejako ngari ka ari lelaki dudok ari atas lalu iya ke dipadu ka ngari ka indu dudok nunga iya ari baroh mangkang tuak enggau arak.
Maia pan nyau chukop alai berengkah bejako lalu samoa orang maioh ngetu randau bukai. Iya ke ngari ka indu enggau orang ti. empu rumah dulu bejako nanya ka pejalai sida ke datai mai bala besai bakanya. Tang dulu orang siko ngansah iya enggau tuak tauka arak. Udah iya bejako nanya ka pejalai, ka kabuah sida datai, iya ngiri ka-tuak tauka arak dalam changkir kena ngansah awak ka iya ke bejako madah ka pejalai enda kakang mansut ka jako lalu enda mega malu. Ai tu dikumbai ai kena ngansah. Nya alai tu munyi sekeda leka ansah iya:
Nya alai tu aya - unggal
Ai telesai tu datai ari sungai
Pandi indai Raja Petara.
Ai sempuli tanah nyadi
Diberi Sempeti Api
Dikumbai kitai Allah Taala.
Nya alai lalu dipie dara tinggi
Dalam pendi periok temaga,
Lalu disarap dara nelap
Enggau lipat kain kesumba.
Udah nya lain dituang
Sida Endun Kumang
Dalam balang jebul segala,
Lain perenchit ka aku mimit
Dalam chubit chawan bebunga.
Nya alai, dipeda tak lejah-lejah
Nengah kelasah anchau sana,
Ngensara ka moa kita
Ngensara ka tugong bala.
Nya alai tu ko aku
Ai bungai mentapu bunga,
Ai keduka ayam raja,
Endang lumor satu pemadu bisa,
Teleba ngerebah ka gajah jelu singa,
Munyi ka ngekah leka buah bindang.
Nya alai tu ga endang teleba kena aku
Ngansah terinting puting dabong saleka
Enggi Keling seduai Laja.
Tang ke lemai tu kena aku
Ngansah terinting puting dabong saleka,
Enggi nuan aya - unggal,
Ngambi ka nuan bejako Inggar didinga nusoi rita,
Awak ka munyi geruda
Injin Selalang.
Irup meh tu, aya - unggal.
Iya lalu ngirupai ansah nya. Orang maioh lalu nempap ka jari gaga ati lalu meransang iya.
Enda lama udah nya, iya ke baru udah ngirup nya tadi bejako ngari ka lelaki lalu nyaut. Tang tuak tauka arak dulu disalin ka iya dalam changkir kena iya malas meri iya ke baru udah bejako tadi ba pengabis genteran jako saut iya lagi. Nya alai kira ka munyi tu jako iya belaboh dulu:
Nya alai nyerumba buli
Ka cheli-cheli tumboh lemai,
Kami bisi datai ditu
Nganjong telinsu langgu buah binjai.
Nya alai di engkah kami di kelasah
Anchau tikai enda sengapa alai.
Lalu disua ka kami ngagai kita
Kemumok dudok berintai tengah ruai,
Lalu disambut kita enggau kukut,
Terima enggau tapa jari megai.
Nya alai lalu ditaroh kita tegoh-tegoh
Enda sengapa alai.
Nya meh ka sengkeram jako kitai
Ngasoh kami datai
Mai bala nitih ka semaia.
Nya alai nyerumba buli ka cheli-cheli,
Tumboh engkeleman,
Bisi kami datai ditu suba
Nganjong telinsu langgu buah kemantan.
Dibai kami ari batang Seblak tebing kanan.
Datai kami ditu lalu disua ngagai kita
Ke kemumok dudok betipan
Penoh ruai datai di tempuan.
Udah nya, lalu disambut kita
Enggau kukut jari kanan.
Taroh tegoh-tegoh simpan dalam tepayan.
Nya alai nya meh ka sengkeram jako kitai
Alai kami ke datai saharitu,
Mai bala sampal enggau anak
Nebah setawak nerantang ka gendang.
Deka besulu ka resu garu melitan,
Deka begulai ka peratai bungai tanam,
Nyemaka ka lunda jayau Kedayan.
Nya alai pagila deka dibai kami pulai
Ka batang Seblak tebing kanan.
Datai din ila dibiau kami
Enggau selanjau manok jelayan,
Digayang ka kami belalang babi dupan.
Deka begulai ka peratai bungai beta,
Deka nyemaka ka lunda minyak lala,
Deka besulu ka resu garu baga.
Nya alai pagila dibai kami pulai
Ka batang Seblak tebing kiba.
Datai din ila digayang ka kami
Babi belalang mesai pala,
Lalu dibiau enggau selanjau manok lia.
Udah nya baru iya ka ngari ka orang ke empu rumah bejako baru, lalu disaut siko, udah siko saut siko seduai belaban ngena jako karong panjai. Orang maioh tak mending ka seduai. Enti pangan bukai bisi nemu tau mega nyaup pangan bejako. Enti lelaki nguai lain agi jalai jako, lalu lain mega enti iya matak indu nguai. Nya alai, nyau ka pengujong jako seduai nya, baru iya ke ngari ka lelaki bejako ngiring adat belaki bebini ari kalia menya ti ditampong kitai turun menurun datai ka kamaia hari tu. Ditu aku semina nusoi pun jako kena ngiring adat, ngujong ka iya nya penau diri empu ngerintai nitih ka aki ini diri empu. Dalam jako ngiring adat samoa pengudi orang katuai dulu kalia ti dikingat ka kitai diatu disebut magang.
Kabuah alai sida kalia bisi pengudi kenu ko cherita tuai laban sida apin nemu adat belaki bebini, Nya alai tu munyi pun jako iya ngiring adat:
Deka nyimpong semambu ngandong
Tumboh di perabong rumah raya,
Sengkilong tedong ular naga.
Nya alai pala tak kunda-kunda
Nyua ka jangka tampok adat.
Nya alai nampong kenang burong achang
Bungkok belakang ngeruang dada.
Nampong jako burong apu
Ka dulu meda menoa.
Nampong telah burong idah
Siti dilah tiga lubang nyawa.
Nya alai nampong adat aki kitai
Rekaya Lengidi ka buyan
Takut mati parai betu
Berani berumah
Mangkang tisi antara menoa.
Nampong adat aki kitai Kumbang Marau
Pengirau danau lepong Majang,
Penebang batang alu penguji,
Entak ka tanah dalam tujoh,
Sagu ka langit tinggi sapuloh.
Nya alai nampong adat aki kitai
Ke benama Rekaya Limping
Berumah di tuchong
Menyaing Bukit Banting.
Udah nya beripih-ripih nyentok ka datai ba tuai menoa ti alai melah pinang.
BETUSUT.
ABIS JAKO panjai, nya baru tampong betusut. Betusut enda tau enda awak ka nemu penyauh enggau penyemak seduai ka jadi, sakali ka bisi bebelit tauka nadai. Enti sema bisi bebelit dia orang katuai ngadu ka enggau adat kena muai pemali. Enti seduai ka jadi nya endang ditemu ukai orang bukai enggau pangan, lalu enda bebelit nadai tentu guna betusut dalam, tang semina nusut ari ni iya serara awak ka orang maioh nemu penyauh enggau penyemak seduai. Enti sema orang jadi enggau petunggal diri menyadi orang nadai nyebut betusut.
Tusut dalam maioh penatai, tang samoa pun ari antu magang, baka ari Sengalang Burong, ari Kumpang Bedarah, ari Beji enggau ari maioh pun bukai. Tang ditu aku deka nusoi tusut ari Sengalang Burong ari pun ngagai tuboh Beti. Ari Beti ngujong ka ngagai aki ini kitai empu.
BATANG TUSUT.
Abu datai ari munggu tinggang guntur beranak ka Nising datai ari perenching pandang lambor. Nising beranak ka Bedali bejulok tiang balang besegi sarat muat balang bedabong bebini ngambi Antok Nyinok Langgong Tibilong, Dayang Kumang gasing merengong beranak ka Beda’am ngembuan perugan danan gelong ka bengkong bebini ngambi Jawai Mupong bepadong tujoh ringkat, Mau ka tinjau bekabelap beranak ka Beda’ang bejulok api mandang sundang surong, bebini ngambi Dara Saur pengukor mata isau pengundor bala nyerang beranak ka Aki Lang Sengalang Burong, Aki Jugu Menaul Tuntong bebini ngambi Indai Kechendai bepantak jerak, Dara Entaba balun kupak. Tang iya tabin bebirin enda pengerai, sakit lengit enda nvamai, pedera renga nadai asai. Dipesaut ka Manang Likup, dipelian ka Jaban, dipetawai ka Gendai, mindah nama disebut orang Endu Sudan Berinjan Bungkong, Endu Diu Tiong Menyalong beranak ka Dara Tinchin Temaga, Endu Cherebok Mangkok China belaki diambi Menggin beranak ka Sera Gunting bebini ngambi Seri Ngiang beranak ka Sera Kempat bebini ngambi Ranjau beranak ka Ridoh datai ari buloh bauh rejang belambang belaki di ambi Bada beranak ka Gupi anak umbong, belaki diambi Belang Pinggang Antu Gerasi, beranak ka Geraman bebini ngambi Tebari beranak ka Chundau bebini ngambi Beragai beranak ka Beti digelar Bujang Berauh Ngumbang bebini ngambi Duri beranak ka Talak. Beti tujoh kali bebini, tujoh kali balu.
Lalu Beti ke diajar Puntang Raga enda agi ngasoh mantang orang ke beleman salah serak. Ari ajar Puntang Raga tu nya kabuah Beti enda nyadi mantang Abang ke deka jadi salah serak enggau Dayang Tali Bunga.
Ajar:
Naka tu tusut tusoi aku lalu ari tu iya mechah kia-kia nabor sebelah menoa. Tusut beserara laban orang kalia baka kitai ke diatu maioh diri menyadi. Nya alai orang ti nemu tusut nyamai bendar nemu kaban diri. Asai sepi aku, patut samoa kitai ngajar anak-uchu kitai betusut, enda iboh tusut dalam, amat ga nemu nusun aki ini diri empu ngagai empat lima serak. Enti orang ke biak enda diajar nama aki enggau ini ti ngada ka apai enggau indai pan enda ga sida nemu. Lebih agi anak kitai ti diau di nengeri lalu begulai enggau bansa bukai. Indah jako diri empu deh enda tentu terus agi disebut sekeda ti udah dipeda aku empu. Umbas aku ngenang pemanah betusut, nya alai diatu kitai pulai baru ngagai pengerami melah pinang.
PINANG DIBELAH.
UDAH ORANG tembu betusut, enti bisi salah, bisi bebelit lalu diadu enggau adat awak ka nadai agi pemali. Enti sema ukum penyalah bisi pulai ngagai ukum duit, lalu dipedua samoa orang katuai dia ti ngator, tang enti mimit aja bebelit semina lungga bebelit aja dipinta ngagai iya ti melit. Udah nya baru apai indai indu tauka orang ti dikarap ka iya bejako madah ka adat diri empu baka derian enggau bunga pinang. Enti apai indai lelaki nerima adat nya nitih ka pinta apai indai indu, sida lalu nyua ka samoa utai nya dia. Udah nya baru ari lelaki malas madah ka pemesai adat aki ini diri, baka penudok penyandih enggau utai bukai enti bisi. Lalu apai indai indu mega nyua ka samoa adat ti dipinta enti sida nerima. Enti adat indu enggau lelaki enda dipadah ka dulu, melah pinang apin tau dipenyadi. Iya tau numboh ka pengachau enggau laya.
Lepas nya, baru ngator melah pinang. Terubah milih indu siko enggau lelaki siko ti endang pemulih utai, chukop penuai, maioh anak sereta ripih seduai pan ngena, reti nya pangkat unggal. Udah mutus ka berapa sirap pinang enggi lelaki enggau enggi indu, nya baru seduai tama ka bilik lalu miring dia.
Piring nya tadi disimpan begulai dalam selok bebuah dibelit enggau lampit enggau sengkiling laban endang asal bansa Iban keran ka anak tuai nya indu. Nya kabuah ngelagu selok nya nitih ka pekayan indu. Udah chukop adu baka pendiau anak mit dipeda, lalu disandik indu ti dipilih tadi enggau pua kumbu tauka belantan lalu begadai pansut ka ruai. Lelaki tangkup iya tadi udah nganti dudok ba tengah bala di ruai sedia deka nyambut anak nya. Leboh nya indu pansut nyandik selok ka ruai dia iya ngelulu ka diri nyabak munyi anak mit ti baru ada, lalu ditimang iya mega. Indu bukai mega bisi nulong iya ngaga diri nyabak munyi anak mit. Lalu samoa orang maioh begau katawa geli ati ka iya dipeda tak bendar gaya. Datai di ruai anak nya lalu disambut apai iya lelaki ti udah dipadu ka tadi. Apai iya lalu naka penau ngelulu ka diri lalu betimang awak ka orang rami katawa. Udah nya anak nya tadi lalu dikujok enggau pua kumbu di tengah ruai.
Ripih pengawa udah nya, orang ngiga orang ke landik nimang diasoh nindok enggau ngerak anak nya tadi. Udah bulih orang ti diasoh nimang, samoa pengabang maioh jenoh enda inggar mending ka pemanah nyawa enggau leka timang. lya ke nimang nya dudok nunga kujok anak nya. Munyi tu leka timang iya:
NINDOK KA ANAK .
Wo-o-o-o-ho-o-wai.
Nyerumba linda sabong malam,
Nyerumba petang penyarang
Rumah nyeruran
Pasang gitang lampu dian.
Naka pengelembau aku ngangau
Ka tempalau dabong lancham.
Naka pemalu tudah aku
Di lempedu kandang dalam.
Laban penemu enggi aku
Nadai temu tuku kiba kanan.
Agi ga nyawa aku nadai didinga
Enda nyaris nekis inggar daderam.
Tang semadi tu ukai lambu aku
Ngelulu ka sida sanu ibu uman.
Ukai jawang aku nimang
Sulu timang ambai dalam.
Tang semadi gumi aku
Diasoh sida ke empu pengerami
Bebelah ka jeragang pinang kejekan.
Diasoh jayok nindok ka selok
Ka bebuah ngambi gambar miga dudok
Ka belingkok ngelong besimpan.
Semadi lumbi aku diasoh kita
Nindok ka selok ka bebuah manah nyelai,
Nadai ngelui
Ngambi gambar reni baya ngereman.
Nya alai ditindok ka aku
Nunda orang nindok Ka
Endu Kumang Subang Betandok,
Endu Achin Cheremin burit mangkok
Ambai Beragai Bini Tuchok
Datai ari puchok raba narok,
Jalai Laja nampok
Bulih tandok Telanjing burok
Ka belingkok ngelong besimpan.
Nya alai ditindok ka aku
Nunda orang nindok
Ka Endu Buku Kandong
Semambu buntat gamala,
Endu Kumang Kajang menoa
Bini Bujang Sempulang Gana,
Antu kelalu raja ke anda
Balat jedian kejekan.
Nya alai gali galai
Nuan selantang anak tuai
Di tikai janit anyam,
Dikujok enggau pelepok
Ampang belantan,
Bebungkor ka jadam,
Bepanggal ka intan
Dikumbai uman lambu gasan,
Bula limpan tekang la-gempanang wai….
O-wo-o-o-oh-wai———iiiii,
Tekang la-gempanang.
NGERAK ANAK.
Lebu Nangi.
O-wo-o-wai ……..
Dani nuan sendia anak seridi,
Ka gali galai di tikai anyam diri,
Bebungkor enggau menyetor
Ampang menyeti.
Serayong indai Mendong
Enggau tajong batik betawi.
Sengkidang Kumang
Enggau punggang bali menyeti,
Kemilai sida indai di kerigai rusok tisi.
Nya alai digela sida mengua karong beridi,
Ngagai anak kunchit kemali,
Begamal lanji-lanji
Mandi pentali panchor ulak bebuli.
Tang enti tinda nuan deh endun dara
Nyau udah jementa dara mereti,
Pandai di chunggai ujong jari,
Gawa nadai saga enda betanya
Ngagai sida mengua karong beridi.
Panau belakang nuan endun Kumang
Nyau udah terang
Mandang bujang anak lelaki.
Nya alai nuan digela sida
Mengua karong beridi
Ngagai sumbu lampu api
Ke pegari tampak terang.
NGERAK ANAK.
Lebu Ngambat.
Nya alai enti tinda nuan
Nyau udah jementa dara memetat.
Panau isi beranti pati pusat,
Panau bangi sajari nadai rarat.
Pandai nuan di chunggai tunjok empat,
Gawa enda saga nadai betanya
Ngagai sida mengua karong menyimat.
Nya alai digela sida mengua karong menyimat
Ngagai jerumat jarum kawat
Tak rejat-rejat nancham lipat ara tajong.
NGERAK ANAK.
Lebu Nyangkong.
Nya alai, enti tinda nuan
Deh kau lantang anak sendia
Nyau udah jementa dara lempong.
Pandai di chunggai ujong kudong,
Bisa di penyura nyawa ujong dabong.
Gawa pan nuan nadai saga
Enda betanya ngagai sida
Mengua karong kerubong.
Nya alai nuan disabaka ka orang
Enggau bini Linggir benama Anong,
Bini Bayang Indai Tiong
Pandai di chunggai jari ujong.
Landik ngama ai lia
Di pala dulang midong,
Landik nyagam ai garam
Bengaran ka delapan buloh laung.
Nya alai samoa kita digela ka orang
Ngagai jenuar kapal lambong
Benyawa rengong-rengong
Munyi sayap burong
Emperegam kampong.
Nya alai agi ga kita disema ka orang
Ngagai menyanggit bukit Santubong,
Begamal renjong-renjong.
Kaki alun gigi gumbang besabong,
Ari sapiak gulu karak batu anggong.
Punggang setak tumboh kara jemera riong,
Punggang setak tumboh bunga ketula raung
Di inang Kumang seduai Lulong,
Indu sida di Liu Nyatu Padi.
Diambi ka dujong,
Ko aku — lah — sanggul lintang — wai.
O-o-wai.
TlMANG ANAK.
O-o-o-wai —— ah.
Naka penyuma aku nelenga
Ka rasa dabong gigi.
Nyerumba linda lemai hari,
Nyerumba petang penyarang
Rumah menchegi.
Tang ukai jawang aku
Ka nimang sulu tunang ambai ati.
Ukai lambu aku ngelulu
Ka sida sanu ibu kedi.
Tang semadi tinda aku
Udah alah asoh sida ke empu kereja
Pun pengerami,
Bebelah ka jeragang pinang penguji.
Nya alai seit pinang kunchit
Alit di burit lega di ati,
Leka pinang segala dibelah dara Jata
Di baroh singka miga ngeledi.
Kumang ka tebilang tambun puji,
Pandai di chunggai ujong jari,
Indu sida di Liu Nyatu Padi.
Lalu disimpan sida ibu uman
Dalam jelanan tanggam demam resam ransi.
Udah nya baru tembai bejalai pansut ka ruai
Ngiga apai tangkai mengadi.
Lalu besangin indai mempulu lilin
Munyi Baketan palin ngua lilin madu rari,
Lalu muchau indai burong bangau
Munyi Melanau nimbau tukau tanjong Keladi.
Oh! Ni kita deh Sapungga, Sapuntang Medang
Ke udah ngundang aku di simbang papan paji,
Enda ninga kita anak tua endun dara
Nebah nyawa nyabak berai.
Oh! Nama kabuah enda ninga deh indai dara,
Uji surong kitu deh indai endu bini kami.
Tak lalu disua ka indai puna bangka
Lantang anak randa enggau tapa jari beresi,
Lalu sambut apai sempidan bangkut
Enggau kukut ujong jari.
Lalu betimang apai Kumang
Bedindang badi-adi.
Adu-adu kemah ko iya,
Anak aku tak lalendu
Baka lamba batang kayu peru
Tumboh di ulu Seblak menchegi.
Linga-linga kera lantang anak randa
Baka lamba batang kayu kara
Ke tumboh di ulu dia
Pumpong sadepa rarah jelenga
Pangka ka bua pusin bebuli.
Melan-melan salantang anak pinan
Baka lamba batang kayu tekam
Tundan delapan semilan begulor tali.
Lenggi-lenggi anak diri indah enda baka
Lamba batang kayu tuwi
Ke tumboh menoa ili ngerapi madang papi,
Kemah ko timang sida menimang karong beridi.
Nya alai, diatu deh Endun Dara
Ke agi meraya nebah nyawa nyabak berai,
Tang enti tinda iya
Nyau udah jementa dara mereti.
Nyau udah tinggi di lepi sanggul diri,
Pandai di chunggai ujong jari.
Ukai enda iya digela kitai
Kaban mengua karong beridi
Ngagai anak pekaban
Ikan enseriban padi,
Ke begamal lanji-lanji
Betanjak di kaki
Kerangan nunggang.
Wai —— ii.
BERISAN ENGGAU BUNGAH.
SERETA UDAH badu nimang anak samoa orang lalu richah laban berisan, ngirup enggau makai utai ti endang udah lama ayan. Samoa sida ke pangkat apai indai, pangkat aya enggau ibu seduai ke dibelah ka pinang lalu begempuru dudok belaban berisan, Bebalas-balas sida meri pangan ngirup, beripih samoa kaban lelaki ngelaban kaban indu. Balat bendar pengerami, nambah ka sida ke berisan samoa orang bukai numboh ka pemungah ngirup enggau pengerami bukai baka mencha enggau ngajat. Sekeda pengabang barang ke bisi mai ai tuak tauka arak ngambi utai nya kena sida bebalas meri orang ka empu rumah. Laban pengerami balat, nya ngasoh orang enda berasai ngelu pala lalu mabok. Enti pala udah ngelu, barang ke bisi mantai ka ubat enda mabok, lalu meri pangan ke nadai. Barang orang ti gali diangkat ka lalu beri ngirup. Sekeda bala ke mabok di intu kaban iya enggai ka pedis. Barang ke minta indu enggau minta bungai diasoh enggau diperansang orang ka empu rumah. Enti leboh orang balat bungah begagai, suah mega peda aku orang ka empu rumah, empu ruai ngulu ka pengabang mabak pemanggai enggau dinding iya empu ukai enggau ati pedis, tang empa pemalat rindu ati. Tang nyau kamaia hari tu jarang bendar bungah kasar bakanya laban rumah nyau udah kukoh udah tegoh, rumah papan rumah tebelian lalu jarang bisi pemanggai ulih babak. Nya alai orang rebak biak diatu, laban enda teleba tauka enda kala meda bungah bansa nya jampat deka pedis ati lalu belaya leboh sida meda pemungah baka gaya kera dipeda sida.
Siti ari pemaioh macham pemungah ti enda agi dikena kamaia hari tu iya nya ngetas pintu. Bala orang bejalai niti rumah beketas ka pintu. Udah sida ngetas pintu, sida dudok ba tempuan nganti orang ke empu bilik meri sida arak tauka tuak enggau penganan. Lalu siti agi jarang mega iya nya manjok. Pengabang nan panjok di moa pintu lalu orang ka empu bilik meri tuak enggau arak enggau manok nya ke disintak panjok sida. Barang ke enda nakal ngirup sigi lembau enggau orang bungah macham tu enggai ka mabok.
NGIRUP KUPI ENGGAU MAKAI ASI.
UDAH JAM chukop maia ngirup kupi, orang ti jaga jam lalu begerah ngasoh orang betanggong enti utai udah sedia. Samoa pengabang diator dudok lalu orang ke bungah diasoh ngetu. Tang bisi mega sekeda ti enda ulih asoh ngetu majak bebuti enggau tuak laban pala nyau ngelu. Kitai nemu enti pala nyau udah ngelu tentu enda ngasi ka rara orang. Udah utai ditanggong ka ruai samoa pengabang lalu ngirup magang. Bala orang ka indu ngirup kupi makai roti mega di bilik. Udah orang badu, samoa utai ditanggong pulai ka bilik magang. Enda lama takah udah nya orang belaboh baru bungah, birup ka tuak enggau arak, pia mega orang ke ngajat, mencha tauka bepantun belaboh baru.
Orang ti jaga jam maia makai lalu bejalai tama tiap-tiap pintu ngerah orang ka indu berapi. Kira pengumbas iya pengelama udah nya sida bejalai baru meresa pemansau utai ti dipandok. Enti samoa udah mansau, nya baru sida begerah ngasoh orang ka indu besungkit. Udah nya baru orang ka lelaki betanggong baru ka ruai, hari pan nyau ka tawas maia nya. Samoa orang ke ngirup enggau main bukai diasoh ngetu magang enggai ka enda makai. Udah samoa pengabang diator dudok baka ke udah, lalu pemakai pan udah ga chukop ator, nya baru ngasoh pengabang makai belubah-iubah. Badu makai samoa utai ditanggong pulai ka bilik. Samoa pengabang makai naka pengenyang enggai ka pulai lapar.
Badu makai belaboh baru ngirup ngabis ka ai, Samoa ai dibantai ka magang awak ka pengabang ngabis ka ai. Maioh bendar ruai alai orang nudok ka takar, bisi mit bisi besai takar, pia mega asai ai bisi nyamai bisi enda nadai sabaka. Ukai main pengerami leboh orang betakar ngabis ka ai tuak.
Nya alai sema jako kitai munyi ke “ngabis ka ai” tauka “ngalah ka takar” enti orang ragak.
Orang ke empu rumah naka ulih meransang pengabang ngirup awak ka sida mabok lalu enda ulih pulai. Enti orang mabok gaga bendar ati orang empu rumah. Tang pengabang mega naka ulih nguji ka ubat enda mabok barang ke bisi. Enti hari nyau tawas lalu ai agi maioh, suah dipelintang ka orang empu rumah alu ba pala tangga enggai ka pengabang pulai.
PENGABANG PULAI.
NYAU TAWAS hari, samoa pengabang besikap enggau ati gaga mulai ka diri mai indu. Sida ka biak begendang niti rumah ari setak ka setak ngerah samoa pengabang bebai pulai lalu ngansak sida ka indu beradu masok ka ngepan. Sapagi-pagi nya indu ke diambi enggau indu pengabang ke be ngepan beradu magang. Udah samoa sida tembu lalu dipejalai ka niti rumah dua tiga kali besundang enggau gendang awak ka samoa orang meda pemanah gamal sida enggau pemanah ngepan. Badu bejalai niti rumah lalu nurun ka tanah begadai-gadai nitih ka pangkong gendang. Samoa pengabang pulai magang enggau ati gaga ati rindu mai indu enggau panjong enggau katawa. Barang pangan ti agi mabok di ma pangan iya, lalu sabarang ke ngelu pala ngirit diri di iring pangan, ama rebah ama terap. Nya ti ngerami bala serantu jalai.
Enda jauh udah ngejang ka rumah bala ngetu awak ka indu ke bengepan muka ngepan sida lalu begari ngena gari kena bejalai. Tang enti merau ngepan indu enda dibuka nyentok ka datai ba pengkalan rumah lelaki. Udah tembu bebuka ka ngepan bala mupok bejalai begadai-gadai datai ka pengumbas iya alai ngetu belelak tauka merarau. Sida ke begendang nadai ngetu udah siko-siko besilih-silih nebah gendang. Nyau datai ba semak rumah tauka ba pemandi tauka pengkalan, dia bala ngetu magang mandi enggau begari ngena gari manah. Orang ke enda enggau tinggal di rumah endang udah sedia nganti bala datai. Rumah udah disikap sida kenyau ari pagi hari nya. Tempuan, ruai, pantar enggau bilik dianchau ka tikai magang lalu tempuan dikajang pua kumbu magang samanjai rumah. Pia mega bilik, endang udah dipadu ka alai indu tama dulu enggau bilik laki iya udah mega dilagu sereta dianchau pua kumbu naka pemanah. Dulang enggau batu pengunsut udah disedia ka ba pala tangga enggau babi ke digayang kena bala niki udah garing-garing ba kaki tangga.
Badu mandi samoa orang beradu sedia deka niki, samoa ngepan dipasok ka baru. Orang ke beradu besak ati laban gendang bala sida timbal gendang bala ke nganti di rumah. Tembu beradu bala lalu bejalai belubah-lubah nitih ka gendang, kenulu ka orang ka tuai betangkan-tangkan nitih ka penuai. Datai ba kaki tangga lalu apai indai indu tauka barang orang bukai ti patut enggau ari rumah indu lalu diasoh ngayang babi ke lama udah garing-garing dia.
Udah babi mati, nya baru bala niki tang enda diwong baka niki ba rumah indu, semina dipejalai ka besundang niti rumah awak ka orang maioh meda indu ti diambi enggau indu bukai mega ti bengepan. Chukop sundang dua tiga kali indu lalu dibai tama ba bilik orang bukai dulu ti endang udah disedia ka orang alai iya tama.
Nyau kalama, udah ngirup indah ba bilik nya, bala indu lalu mai iya ngagai bilik laki iya. Indu ti diambi endang selalu dipeda malu moa iya, tang ati iya di dalam enda kitai nemu. Udah dudok udah indah, nya baru iya muka ngepan iya lalu begari ngena kain baju ke manah.
Endang sigi adat leboh indu baru datai ba rumah laki iya, iya dibai tama bilik orang bukai dulu. Bakanya mega endang sigi adat, lelaki ti empu bini di ambi enda tau di rumah leboh bini iya niki, tang belalai sebelah babas tauka ba langkau ti semak rumah nya, Kabuah alai pia, orang ka tuai nadai madah ka kabuah enggau pemali.
Nyau udah malam hari nya baru lelaki nya datai niki ka rumah ngena gari naka pemanah ti kemisi iya. Udah hari nyau petang, orang ka indu di bilik nyerungkai sarang gari indu lalu ngeredai samoa iya dalam bilik awak ka orang samoa meda laban tu endang sigi adat.
Lemai nya samoa orang ka lelaki makai di ruai lalu indu makai di bilik. Nya tanggong orang ti empu kereja. Udah babi ti kena orang niki tadi tembu bela, asi pan udah ga mansau orang lalu bekumbai makai. Samoa orang dudok di ruai lalu asi enggau lauk ditanggong ka ruai, lalu chapak mangkok disadong nyelinting tuboh. Diatu samoa orang makai majak ka diri. Badu makai enti bisi agi ai tuak enggau arak lalu belaboh ngirup. Pengerami pulai ngambi indu nitih ka pemisi utai enggau peneka orang ti pun pengawa.
BEBIAU.
UDAH BADU makai lemai kira jam pukol semilan tauka pukol sapuloh, indu ti diambi enggau dua tiga iko indu ke empu rumah beradu masok ka ngepan laban sedia deka bebiau. Pia mega lelaki ti empu bini enggau dua tiga iko orang ka bujang beradu ngerias diri. Udah sida sama tembu orang lalu ngumbai lelaki tama ka bilik. Lelaki tama enggau sida ti ngulu ka iya, lalu samoa sida enggau indu mega dudok atas satawak ti dibap enggau pua kumbu genap tuboh sida. Tau mega dudok atas kerusi dibungkor pua kumbu enti bisi kerusi chukop tuboh sida. Dia sida dudok betunga moa tauka berimbai-rimbai nitih ka ator orang ti ngator sida. Malu bendar moa indu dipeda, ama mirah, ama puchat gamal moa iya dipeda, lelaki pan pia mega. Orang maioh bendar ngenjing penoh bilik, sekeda nilik ari sadau lalu sekeda bediri ari ruai enggau nyengok ari lubang penyengok ti ngimbai bilik nyau berebut deka meda. Enti rumah enda tegap tentu enda tan laban pemaioh orang. Dia orang rami bendar, barang ke bungah, bungah, barang ke katawa, katawa, sama gaga ati.
Enda lama udah nya orang ke diasoh miau seduai lalu datai. Orang lalu nyua ka manok ti kena bebiau ngagai iya lalu digerempong ka iya kaki manok nya. Udah nya iya lalu bediri nyebut leka biau, orang maioh diau jenoh enda ragak mending ka leka biau, Nya alai pun biau iya munyi pun biau bukai mega, ari:
Sa, dua, tiga, empat,
Lima, enam, tu-u-u-joh!
Aku ngangau ka Petara Aki,
Petara Ini, Petara Apai, Petara Indai,
Sempandai ke ngaga kitai.
Minta tulong minta sukong,
Minta tela minta peda,
Minta iching minta perening.
Awak ka bekebong baka langit,
Betuchong baka bukit.
Bepunchak baka jala,
Betuchong baka Lingga.
Bulih mudah, bulih gerah.
Beranak, betelesak,
Baka tebu lulong tambak,
Baka pisang lulong anak.
Gerai nyamai, gayu guru,
Nadai apa ko Petara.
Pengabis leka biau manok lalu disayat, orang pan lalu begau nempap ka jari gaga ati. Udah nya darah manok tadi lalu kena ngenselan seduai melaki bini. Lepas nya orang ngirup, bungah enggau makai utai naka pemisi utai dia. Lelaki ti dibiau tadi pansut ka ruai lalu indu mengkang diau di bilik nya mega. Nyau jauh malarn orang sarumah nya pulai tindok ngagai bilik diri empu magang nat ka pengelelak ulih dua hari ke udah. Tang lelaki ke bebini apin patut tindok ka bilik begulai enggau bini iya malam nya.
NYUNDANG PINANG.
TIGA MALAM ka empat hari indu udah datai ba rumah lelaki alai seduai melaki bini nurun nyundang pinang ngagai rumah indu. Bisi siko dua orang ke bujang ngulu ka seduai lalu nulong mai gari, penganan tauka utai bukai ke temu orang ti ngulu penatai seduai di rumah indu. Taja pan timpoh endang tiga malam alai nyundang pinang, enti enda lantang jai mimpi, bisi ninga burong jai tauka ninga orang bisi parai, apin ga nyadi sahari nya, tang nganti hari bukai ke lantang. Enti bisi orang parai didinga rita sekumbang apin nemuai, nya enda manah. Tang udah nya seduai tau belega enda begulai sabulan clua. Pia mega enti bisi mimpi enggau burong jai dalam kandang pemali, seduai diasoh belega dulu tauka asoh empa orang ke sigi tau makai burong, makai mimpi awak ka nadai apa-nama. Pia mega enti sema burong tauka mimpi balat jai diabas enggau atau babi kena nyenaga iya. Enti atau babi jai seduai enda tau jadi. Tang utai ke bakatu jarang bendar nyadi laban enti burong balat jai datai ka dua tiga iko orang di asoh makai awak ka tabar lalu enda nganu.
Tang tau mega nyadi enti lelaki tauka indu madah ka diri bisi mimpi jai ditempa ka ngapa laban enggai jadi tang takut betimbang. Tang utai bakanya mar bendar kitai nyagam. Nyangka laban endang enda tentu deka ka pangan, tang laban alah pejal apai indai.
Tu pulai ngagai penurun seduai ke mansang nyundang pinang baru. Serantu jalai sida bejalai mending lalu berati ka burong. Enti lelaki endang nemu burong sida manah, iya enggai nusoi ngagai orang bukai laban endang temu iya manah enggai ka kabau. Leboh datai di rumah sida niki baka temuai bukai mega. Udah begari udah dudok indah orang maioh sarumah nya datai ngulu penatai sida. Orang ka indu begulu di bilik, lalu orang ka lelaki begulu di ruai mega. Samoa utai di empa ti dibai sida diserungkai lalu di empa orang ke ngulu dia. Sarang gari lelaki diserungkai lalu samoa gari iya di redai di ruai awak ka orang meda pemaioh enggau pemanah, laban tu endang adat. Maioh pan gari lelaki iya enda tau enda nginjau salambar dua gari orang bukai nitih ka adat. Tiga hari, tiga malam gari mengkang diredai di ruai.
Sekumbang tiga malam nya lelaki patut tindok di ruai. Enti iya nemu reti, patut iya anang beguai tindok dulu ari orang ke empu rumah tang naka ulih tiga lemai nya nat ka diri. Kabuah pia, laban enti samoa orang udah tindok magang, iya bisi ninga rusa, kijang, pelandok, punggu laboh tauka burong bukai enti orang bukai sarumah nya nadai ninga, tang semina iya aja. Nya manah bendar burong ngasoh kaya ngasoh raja ngasoh panjai umor tauka berani. Tang enti orang bukai sarumah nya bisi ninga lalu bisi nyebut pagi, burong nya enda manah lalu enda tau enda asoh empa orang, tauka seduai iya belega.
Enti lantang udah lepas tiga malam seduai iya mulai ka diri. Sida ke nganjong seduai udah pulai dulu naka samalam aja, Udah seduai angkat, samanjai jalai seduai bejalai enggau lantang mending ka burong engka bisi burong manah nyentok ka datai di rumah diri empu. Enti sema bisi burong salah tauka jai diasoh empa orang, awak ka tabar nadai ngapa, nadai nama.
Udah seduai datai di rumah pulai nyundang pinang nya meh pengabis adat melah pinang lalu nadai pementi nadai pemali agi ke betimpoh nemuai. Udah nya nemuai lantang ati, nitih ka pengelantang enggau peneka ati seduai melaki bini. Enti baka lelaki nguai ka indu, udah lepas nyundang pinang nya baru seduai mulai ka diri nitih ka pengelantang ngagai rumah indu. Ator ke manah sataun nya seduai gawa kia, gawa kia, reti nya ngelama nya ba bilik indu, lalu ngelama nya ba bilik lelaki sekumbang ke agi rumpas, enti nienoa enda bengat jauh. Pisit agi nemuai manah agi sataun nya, ukai belama iya. Siti kabuah manah ari pisit nemuai sakumbang taun baru jadi laban samoa diri sabilik ti ditinggal ka belaki tauka bebini enda nyamai ati, lalu enti bejarit nemuai enda tentu balat berasai ati enggau lelengau. Leboh menantu enggau anak bam datai nemuai balat bendar pengaga ati, ukai ba siko aja tang samoa mensia, ngembuan ati nya magang.
SARAK.
ENTI ORANG sarak baru udah melah pinang, sakalika lelaki tauka indu enggai ka pangan agi enggau nadai tentu tegal, sapa seduai muai pangan kena tinggang penyalah nitih ka pemesai ukum di menoa nya. Enti sema lelaki muai indu, penyalah iya besai agi ari enggi indu. Nambah ka ukum Perintah iya mega di pinta mayar pemalu ngagai iya ti dibuai, nitih ka pemesai adat ti selalu dikena di menoa nya. Bisi mega sekeda lalu apin begulai, enda tanti ka nyundang pinang alai muai pangan, tang jarang ke bansa nya. Utai ke bakatu selalu nyadi enti ati barang sapa seduai ka jadi nya endang enggai, sakalika enggai ka gamal, bisi orang bukai dikadeka tauka tegal bukai, tang alai nyadi melah pinang laban pejal apai indai. Kabuah alai minta pemalu ngagai iya ke muai, laban tu dikumbai semina ngabas ruang bilik orang, nya kabuah apai indai malu. Kereja bansa nya endang jai, semina beduan, ngayah, ngasa lalu ngemalu orang. Suah mega apai indai iya ti dibuai minta bayar pengerugi ti udah kena melah pinang.
Enti sema sarak nyau udah antara bulan antara taun taja nadai tentu tegal lempong agi ga penyalah lalu pemalu nadai dipinta apai indai. Tang enti sema sarak maia nyau bisi anak lain agi ga adat. Temu aku jarang orang ke sarak enti nyau udah bisi anak enti nadai tegal ti besai laban ati nyau lebih agi ngerunding anak. Iya ke diatu adat Iban muai pangan kelalu lempong, nya alai orang mudah bendar ngelengka ka pangan. Bisi mega aku nemu runding sekeda orang endang rindu ka maioh rambang, laban nya manah ko sida. Kabuah alai manah ko sida laban maioh orang deka, lalu sida ngemenang ka diri tampak bebini tampak belaki. Pelaba aku nyangka maioh orang setuju enggau aku ngumbai ati enggau runding ti bakanya salah bendar lalu enda tau enda diubah.
Jangka aku orang ke jadi enggau jalai melah pinang lubah agi sarak enti chukop jako, chukop aum apai indai enggau seduai ke jadi, laban ngenang pengerugi enggau pengiroh diri empu enggau kabari belayan kulu kili ti udah besaup ka pengerami nya. Nya alai enti ulih anang ngudah ka din bebini belaki laban enda lebu asai bisi pengiroh enggau pengerugi.
